搜尋

認識哀傷五階段

認識哀傷五階段

「當你願意真正的走進悲傷,你也才能從中真正走出來。」

唔少人都曾經歷失去,失去離世嘅親人或寵物、失去一段親密嘅關係、失去一份穩定嘅工作⋯失去的往往令人難以承受,呢種哀傷嘅情緒令人覺得深刻同痛,更會伴隨著唔同嘅負面情緒例如憤怒、懷疑、內疚、悔恨等…失去帶唻嘅傷口有時好難癒合,每當有零碎片段喚起失去嘅記憶,就好似被人揭起瘡疤一樣⋯⋯。

美國精神病學家Elisabeth Kübler-Ross(庫伯勒-羅絲)喺佢嘅著作On Death and Dying 提出人喺面對失去帶來嘅哀傷常會反覆經歷五個階段 (稱為哀傷五階段 Five Stages of Grief),分別是Denial (否認), Anger(憤怒), Bargaining(討價還價) , Depression(沮喪) 和Acceptance (接受),大家可以睇睇以下例子,回想下自己曾否經歷呢啲階段

  1. Denial (否認)

當我地聽到失去嘅消息時,由於傷心得讓人難以接受,好多人傾向會第一時間否認殘酷的事實, 呢個都係一種常見嘅心理防禦機制 (Defense Mechanism),寧願解釋為呢個係一個笑話同惡夢以緩和失去帶來嘅驚嚇。

例如當收到伴侶突然話要分手嘅訊息,或者我哋會話:「唔會嘅,唔係真,你講笑咋嘛?」「你唔好玩啦, 一啲都唔好笑!」。

 

  1. Anger (憤怒)

當我哋冇辦法再否認、逃避同欺騙自己時,失去嘅痛苦容易再度侵襲。由於仍未能接受到失去帶唻嘅痛苦,為咗避免崩潰,我吔經常會將哀傷訴之於憤怒,將負面情緒投射到他人身上,例如控訴或埋怨對方嘅離去為我哋帶唻傷痛。

例如當我哋確認伴侶要離開自己,我地或會憤怒地指責「我為你付出咗咁多你講分手, 你真係一個賤人。」「你要離開我,當初就唔好追我應承我咁多」甚至會鬧埋介紹你地認識嘅朋友「佢咁衰你就唔好介紹比我識啦!」

 

  1. Bargaining(討價還價)

當憤怒過後,失去帶來嘅沉重無助感會令我哋開始想諗一啲方法去改變現狀,因而會以討價還價嘅行為來嘗試改變、挽回呢個唔想承受嘅事實

例如會同伴侶講數,睇下可唔可以改變分手嘅事實: 「只要你唔好唔要我, 我咩都願意」、「如果我承諾改我啲壞脾氣,你可唔可以比多次機會我? 」

 

  1. Depression(沮喪)

當鬧又鬧過,數又講完都唔能夠改變失去嘅事實, 我地或會開始感到後悔自責,後悔自己冇好好珍惜、內疚自己嘅過失導致失去,自責自己冇一早去改變現狀,而感到非常沮喪,喺呢個階段,我哋會因確實體會到失去嘅事實而變得消極、抑鬱…

例如伴侶點都唔肯復合,我地可能會自怨自艾「最衰係我冇好好珍惜佢」,慢慢積存咗好多負面想法同情緒,嚴重嘅會失去咗生活嘅動力同興趣「冇咗佢我嘅生活冇哂意義」

 

  1. Acceptance (接受)

喺呢個階段,我哋確切地接受咗失去嘅事實,情緒漸趨平靜同平伏,從中成長和學習,可以慢慢重新出發,重建新生活,當我們接受了分手的事實,我們或會對自己說:「沒事既」「會過去的」。

 

備註: 每個人面對哀傷嘅時間同歷程都不同,並非每個人喺面對失去時都會經歷所有階段,我哋都未必會順序經歷呢啲階段,例如有啲人可能會停留喺某個階段好耐都未喺哀傷中復原,有啲人可能會跳過某個階段都能處理同接受到失去。

人總會面對失去嘅傷痛,喺面對哀傷時,我哋可以嘗試檢視自己嘅階段同狀況,幫助自己調整心態去提升面對哀傷嘅承載力。同時,請容讓自己感受哀傷嘅感覺(有負面感覺係好正常的!),唔駛強迫自己去即刻接受,都唔好怪責自己咁耐都未療合,過於焦急或逃避只會延長停留喺哀傷嘅時間同階段。

 

輔導心理學家Hiro Kwok @APPHK

鳴謝APPHK (www.apphk.org)